Donald Trump: పోర్న్‌స్టార్‌ వివాదంతో ట్రంప్‌పై కాసుల వర్షం

24 గంటల్లో రూ.33 కోట్లు

వాషింగ్టన్‌: లైంగిక వేధింపుల కేసు.. అమెరికా మాజీ అధ్యక్షుడు డొనాల్డ్‌ ట్రంప్‌పై కాసుల వర్షం కురిపిస్తోంది. పోర్న్‌స్టార్‌ స్టార్మీ డేనియల్స్‌ వివాదంలో విచారణకు మన్‌హటన్‌ గ్రాండ్‌ జ్యూరీ విచారణకు అనుమతిచ్చిందన్న వార్త వెలువడిన 24 గంటల్లోనే ఆయనపై అభిమానుల్లో సానుభూతి పెరిగింది. విరాళాలు వెల్లువెత్తాయి. 2024 అధ్యక్ష ఎన్నికలకు సిద్ధమవుతున్న ఈ మాజీ అధ్యక్షుడికి 24 గంటల్లోనే 4 మిలియన్‌ డాలర్ల (రూ.32.87కోట్లు)ను అభిమానులు పంపించారు. ఇందులో 25 శాతానికిపైగా చందాలు.. తొలిసారి విరాళాలు ఇస్తున్న దాతల నుంచే రావడం గమనార్హం. ‘‘అమెరికాలోని 50 రాష్ట్రాల నుంచి విరాళాలు వచ్చాయి. ట్రంప్‌ ప్రచారానికి వస్తున్న సగటు విరాళాలు 34 డాలర్లే. దీన్ని బట్టి ఎంత మంది సాధారణ ప్రజలు విరాళాలు ఇస్తున్నారో గుర్తించండి. న్యాయవ్యవస్థను ఆయుధంగా వాడుకోవడాన్ని అమెరికన్లు తిరస్కరిస్తున్నారని క్షేత్రస్థాయిలో వస్తున్న విరాళాలను బట్టి తెలుస్తోంది’’ అని ట్రంప్‌ ప్రచార బృందం ప్రకటన విడుదల చేసింది. 

స్మార్ట్‌ డేనియల్స్‌పై కూడా..

ఈ కేసు నేపథ్యంలో పోర్న్‌స్టార్‌ స్టార్మీ డేనియల్స్‌ పంట కూడా పండింది. ఆమె ఫొటోలు, సంతకంతో కూడిన మర్చెండైజ్‌ను కొనేందుకు జనాలు ఎగబడుతున్నారు. డేనియల్స్‌ బికినీ ధరించిన చిత్రంతో పాటు ఆమె సంతకం ఉన్న టీషర్టులకు తెగ ఆర్డర్లు పెడుతున్నారు. ఒక్కో టీషర్ట్‌ను రూ.1600-1700 మధ్య విక్రయిస్తున్నారు.