జపాన్‌ సముద్రంలో కూలిన అమెరికా సైనిక విమానం

 ఒకరి మృతి
ఏడుగురి గల్లంతు

 టోక్యో: అమెరికా సైనిక విమానం బుధవారం జపాన్‌ సముద్రంలో యకుషిమా దీవి సమీపంలో కుప్పకూలింది. ఆ సమయంలో అందులో ఎనిమిది మంది సైనిక సిబ్బంది ఉన్నారు. ఒకరు మృతి చెందారని.. మిగతా ఏడుగురి ఆచూకీ ఇంకా తెలియలేదని జపాన్‌ తీర రక్షణ దళం తెలిపింది. ప్రమాద కారణాలను వెల్లడించలేదు. మంటల్లో చిక్కుకున్న విమానం సముద్రంలో పడిపోవడాన్ని గుర్తించిన స్థానికులు సమాచారం ఇవ్వడంతో తీర రక్షణ దళాలు రంగంలోకి దిగాయి. ప్రమాద ప్రాంతంలో ఒక వ్యక్తిని రక్షించి తీరానికి చేర్చాయి. తర్వాత అతను ఆసుపత్రిలో మరణించినట్లు వైద్యులు ధ్రువీకరించారు. ఓస్ప్రే అనేది అమెరికా సైన్యానికి చెందిన ప్రత్యేక విమానం. ఇది హెలికాప్టర్‌గా, విమానంగానూ పనిచేస్తుంది. ఈ ఏడాది ఆగస్టులో కూడా అమెరికా మెరైన్‌ విభాగానికి చెందిన రెండు ఓస్ప్రే విమానాలు డార్విన్‌ నుంచి 80 కిలోమీటర్ల దూరంలోని తివి ద్వీపానికి బయల్దేరాయి. వీటిల్లో ఒకటి కూలిపోయింది. ఇప్పటికే ఈ రకం విమానాలు ఎక్కువగా ప్రమాదాలకు గురవుతున్నాయి. 2022లో ఈ రకం విమానం కూలి ఐదుగురు సైనిక సిబ్బంది చనిపోయారు. అదే ఏడాది నాటో శిక్షణ సమయంలో నార్వేలో మరొకటి ప్రమాదానికి గురైంది. ఆ ఘటనలో నలుగురు సిబ్బంది చనిపోయారు. 2017లో కూడా రెండు కుప్పకూలాయి.