ఏడేళ్ల పిల్లలకు సైనిక శిక్షణ

 చైనా కఠిన నిర్ణయం

బీజింగ్‌: క్రమశిక్షణ, నిబంధనల పేరిట చైనా ప్రభుత్వం కఠిన నిర్ణయాలు తీసుకోవడానికి వెనకాడదు. తాజాగా ఏడేళ్ల పిల్లలకు సైనిక శిక్షణ ఇస్తోంది. పోరాట సామర్థ్యాన్ని పెంపొందించేందుకు అథ్లెట్లకు కొద్ది రోజుల పాటు ఈ కఠిన శిక్షణ అందిస్తోంది ఇదివరకు చైనా ఫుట్‌బాల్‌ జట్లు కూడా ఇదే తరహా శిక్షణ పొందాయి. కమ్యూనిస్టు పార్టీ విలువల విస్తృత ప్రచారంలో భాగంగానే ఈ తరహా చర్యలు తీసుకుంటారనే అభిప్రాయం ఉంది. ప్రస్తుత శిక్షణ కార్యక్రమంలో ఏడేళ్ల నుంచి 25 ఏళ్ల మధ్య వయసు గల అథ్లెట్లు భాగమయ్యారు. షాంఘై నగరంలోని 11 కేంద్రాల్లో 932 మంది అథ్లెట్లు తర్ఫీదు పొందుతున్నారు. ‘వయసుతో సంబంధం లేకుండా ప్రతిఒక్కరూ ఈ అవకాశం పట్ల సంతోషం వ్యక్తం చేస్తున్నారు’ అని పురుషుల జిమ్నాస్టిక్‌ హెడ్‌ కోచ్‌ వెల్లడించారు. జట్లు సమష్టిగా, క్రమశిక్షణతో పనిచేసేందుకు, ఐరన్‌ ఆర్మీని సృష్టించేందుకు ఈ కార్యక్రమం ఉపకరించనుందని వార్తా కథనాలు వెల్లడించాయి.