అవును.. కొవిడ్‌ సమయంలో సరిగా స్పందించలేదు

 వైరస్‌ తీవ్రతను తక్కువ అంచనా వేశాం
బాధితులకు క్షమాపణలు చెబుతున్నా
విచారణలో బ్రిటన్‌ మాజీ ప్రధాని బోరిస్‌ జాన్సన్‌

లండన్‌: కొవిడ్‌ వైరస్‌ తీవ్రతను తమ ప్రభుత్వం తక్కువ అంచనా వేసిందని బ్రిటన్‌ మాజీ ప్రధాని బోరిస్‌ జాన్సన్‌ పేర్కొన్నారు. బుధవారం ఆయన కొవిడ్‌ సమయం(2020)లో ప్రభుత్వం వ్యవహరించిన తీరుపై బహిరంగ విచారణ జరుపుతున్న కమిటీ ముందు హాజరయ్యారు. చైనాలో వైరస్‌ ప్రారంభమవుతున్న దశలో తమ ప్రభుత్వం ఉదాసీనంగా వ్యవహరించిందని అంగీకరించారు. అయితే దీనికి తానొక్కడినే బాధ్యుడిని కాదని చెప్పారు. ఇది సామూహిక వైఫల్యమని, ఇందులో తన మంత్రులు, అధికారులు, శాస్త్ర సలహాదారుల బాధ్యత కూడా ఉందని అన్నారు. వైరస్‌ తీవ్రతపై వారు తగిన స్థాయిలో ప్రభుత్వాన్ని హెచ్చరించలేదని పేర్కొన్నారు. 2020 ఫిబ్రవరిలో వైరస్‌పై ఐదు సమావేశాలు జరిగాయని.. అందులో ఒక్కదానికీ తాను హాజరు కాలేదని వెల్లడించారు. ఆ సమావేశాల మినిట్స్‌ను మాత్రం ఒకట్రెండు సార్లు చూశానని తెలిపారు. కొవిడ్‌తో బ్రిటన్‌లో సుమారు 2,30,000 మంది చనిపోయారు. విచారణలో జాన్సన్‌.. కొవిడ్‌ బాధిత కుటుంబాలకు క్షమాపణ చెప్పారు. ఆ సమయంలో ఓ ఆందోళనకారుడు ‘‘మృతులు మీ క్షమాపణలు వినలేరు’’ అనే పోస్టర్‌ పట్టుకొని నిరసన తెలిపారు. వెంటనే ఆ వ్యక్తిని విచారణ గది నుంచి బయటకు పంపారు.