సూయెజ్‌ కాలువలో వంతెనను ఢీకొట్టిన రవాణా నౌక

కైరో: ప్రపంచ వాణిజ్య రవాణాలో అత్యంత కీలకమైన ఈజిప్టులోని సూయెజ్‌ కాలువలో బుధవారం ఓ నౌక ప్రమాదానికి గురైంది. సింగపూర్‌ నుంచి నెదర్లాండ్స్‌కు వెళ్తున్న రవాణా నౌక సూయెజ్‌ కాలువలో ప్రయాణిస్తూ ఇస్మైలియా నగరం వద్దకు చేరుకోగానే దాని ముందుభాగంలో ఉండే రడ్డర్‌ విరిగిపోయింది. దీంతో నౌక అదుపు తప్పి మాన్సీ వంతెనను ఢీకొట్టింది. ఈ ప్రమాదంతో నౌకకు, వంతెనకు ఎంతమేరకు నష్టం వాటిల్లిందనేది ప్రస్తుతానికి తెలియరాలేదని సూయెజ్‌ కాలువ ప్రాధికార సంస్థ అధిపతి అడ్మిరల్‌ ఒసామా రబీ తెలిపారు. ఇతర నౌకలు ప్రత్యామ్నాయ మార్గంలో సాఫీగా వెళ్లడంతో కాలువలో ట్రాఫిక్‌కు అంతరాయమేమీ కలగలేదని స్పష్టం చేశారు.