తొందరగా ఎదిగితే ఆరోగ్యం చిందరవందర!

దిల్లీ: పదమూడేళ్లకు ముందే రజస్వల అయిన బాలికలు నడి వయసులో టైప్‌-2 మధుమేహానికి గురయ్యే ముప్పు ఎక్కువని అమెరికన్‌ పరిశోధకులు కనుగొన్నారు. పదేళ్లకు ముందే రజస్వల అయితే మధుమేహంతోపాటు 65 ఏళ్లలోగా పక్షవాతానికీ గురయ్యే ప్రమాదం రెండు రెట్లు అధికమని తేల్చారు. 20 నుంచి 65 ఏళ్ల మధ్య వయసులోని 17 వేల మంది యువతులు, మహిళలను పరిశీలించి ఈ అంశాలను నిర్ధారించారు. త్వరగా రజస్వల అయితే ఈస్ట్రోజెన్‌ హార్మోన్‌ కూడా త్వరగా విడుదలైందని అర్థం. అంటే వీరు సాధారణ వనితలకన్నా ఎక్కువ కాలం ఈస్ట్రోజెన్‌ హార్మోన్‌ ప్రభావానికి గురవుతారు. ఇది శీఘ్రంగా మధుమేహానికీ, హృదయ సంబంధ వ్యాధులకూ ఎర అయ్యే ప్రమాదాన్ని పెంచి ఉండవచ్చని పరిశోధకుల అంచనా. అధిక బరువు కూడా ఈ ప్రమాదానికి దారితీయవచ్చు. ఈ అంశాలను పరిగణనలోకి తీసుకుని మహిళల్లో జీవక్రియ, హృదయ సంబంధ వ్యాధులకు సమగ్ర చికిత్సా విధానాలను రూపొందించాల్సి ఉంటుంది.