టైప్‌ 1 మధుమేహానికి కీళ్లవాతం మందు

దిల్లీ: కీళ్ల వాతానికి వాడే బారిసిటినిబ్‌ మందు ఇన్సులిన్‌ ఆధారిత టైప్‌ 1 మధుమేహాన్ని నియంత్రించగలదని ఆస్ట్రేలియా శాస్త్రజ్ఞులు కనుగొన్నారు. వ్యాధి నిర్ధారణ జరిగిన 100 రోజుల్లోనే ఈ మందును వాడితే శరీరంలో ఇన్సులిన్‌ ఉత్పత్తి ప్రక్రియను అది పరిరక్షిస్తుందని, టైప్‌ 1 మధుమేహ పురోగతిని నిరోధిస్తుందని తేలినట్లు వారు తెలిపారు. టైప్‌ 1 మధుమేహం ఉన్నట్లు గుర్తించిన తొలిరోజుల్లో శరీరంలో ఇన్సులిన్‌ ఉత్పత్తి కణాలు గణనీయ సంఖ్యలోనే ఉంటాయని, అవి మరింతగా నాశనం కాకుండా బారిసిటినిబ్‌ మందు కాపాడుతుందని కనుగొన్నారు. దీని వినియోగంతో బాధితులు తక్కువ మోతాదు ఇన్సులిన్‌తోనే జీవితం గడపగలుగుతారని పేర్కొంటున్నారు.