మార్చి 17న రష్యా ఎన్నికలు.. పోటీపై ఇంకా పెదవి విప్పని పుతిన్‌

మాస్కో: రష్యా అధ్యక్ష ఎన్నికలను వచ్చే ఏడాది మార్చి 17న నిర్వహించాలని అక్కడి చట్టసభ సభ్యులు గురువారం నిర్ణయించారు. ఇందుకు సంబంధించిన ప్రతిపాదనకు ఆమోదం తెలిపారు. దీంతో ఐదోసారి అధికారాన్ని చేపట్టేందుకు పుతిన్‌కు మార్గం సుగమం అయినట్లే అని భావిస్తున్నారు. పుతిన్‌ రెండు దశాబ్దాలకుపైగా అధికారంలో కొనసాగుతున్నారు. ఆయన ప్రస్తుత ఆరేళ్ల పదవీకాలం 2024లో ముగుస్తుంది. ఈ నేపథ్యంలోనే మరో రెండుసార్లు అధ్యక్ష పదవికి పోటీ చేసేందుకు వీలు కల్పించే ఒక చట్టాన్ని ఇటీవల తీసుకువచ్చారు. దీనివల్ల ఆయన 2036 వరకూ ఆ పదవిలో కొనసాగేందుకు వీలు కలుగుతుంది. అయితే 2024 ఎన్నికల్లో  పోటీ చేయడంపై పుతిన్‌ (71) ఇంకా తన నిర్ణయాన్ని ప్రకటించలేదు.