డేటింగ్‌లో భారత్‌, అమెరికా

అమెరికా రాయబారి గార్సెట్టి వ్యాఖ్య

దిల్లీ: భారత్‌-అమెరికా బంధం ప్రపంచానికి మేలు చేస్తుందని భారత్‌లోని అమెరికా రాయబారి ఎరిక్‌ గార్సెట్టి వ్యాఖ్యానించారు. అలాగే రెండు దేశాల బంధాన్ని రొమాంటిక్‌ రిలేషన్‌షిప్‌గా అభివర్ణించారు. ప్రస్తుతం వీరిద్దరు(భారత్‌-అమెరికా) డేటింగ్‌లోనే ఉన్నారని చమత్కరించారు. ‘ఈ ఇద్దరి బంధం చాలాకాలం పాటు సంక్లిష్టంగానే కొనసాగింది. కానీ, ఇప్పుడు మాత్రం డేటింగ్‌లో ఉన్నారు. కాలక్రమేణా ఒకరి అలవాట్లు మరొకరు  గ్రహిస్తారు. ప్రస్తుతం ఈ బంధం ఎంత దూరం ప్రయాణించగలదో అంచనా వేయడానికి ప్రయత్నిస్తున్నారు. అయితే, దానిపై కాస్త సందిగ్ధత ఉంది. కానీ వీరిద్దరు కలిసి ప్రయాణించాలని మనస్ఫూర్తిగా కోరుకుంటున్నారు. భారత్‌-అమెరికా కలిసి ఉండటానికి చైనా కారణం అని విపరీతంగా ప్రచారం జరుగుతోంది. కానీ ఆ వాదనపై నాకు అస్సలు నమ్మకం లేదు. ఈ బంధానికి 95 శాతం ఇతర కారణాలున్నాయి’ అని గార్సెట్టి భారత్‌-అమెరికా బంధంపై వ్యాఖ్యానించారు.