ఉద్యోగులకే తన సంస్థను ఇచ్చేసిన పెద్దాయన ఇక లేరు..

ఇంటర్నెట్‌ డెస్క్‌: కంపెనీ లాభాలకంటే ఉద్యోగులకే ఎక్కువ ప్రాధాన్యతనివ్వాలని పిలుపునిచ్చిన ‘బాబ్స్‌ రెడ్‌ మిల్‌’ వ్యవస్థాపకుడు బాబ్‌ మూర్‌ (94) ఇటీవల కన్నుమూశారు. అమెరికాకు చెందిన బాబ్‌.. 1978లో ఈ సంస్థను నెలకొల్పి ఉన్నత స్థాయిలో నిలిపారు. 2010లో తన 81 పుట్టినరోజు సందర్భంగా నాటి 209 మంది ఉద్యోగులకు యాజమాన్య వాటాలను కేటాయించారు. అప్పటికే మూర్‌ యాజమాన్యం నుంచి వైదొలగడం గమనార్హం. ప్రస్తుతం 700 మంది ఉద్యోగులు ఉండటంతో సంస్థ పూర్తిగా ఉద్యోగుల కంపెనీగా మారిపోయింది. ఫోర్బ్స్‌ ప్రకారం.. 2018 నాటికి బాబ్స్‌ రెడ్‌ మిల్‌ ఆదాయం 100 మిలియన్‌ డాలర్లు. ప్రస్తుతం 70 కంటే ఎక్కువ దేశాల్లో రెండువందలకి పైగా ఉత్పత్తులను విక్రయిస్తోంది. ఫిబ్రవరి 10న మూర్‌ కన్నుమూశారని కంపెనీ ఓ ప్రకటనలో వెల్లడించింది. ఆయన మృతి పట్ల ఉద్యోగులంతా సంతాపం ప్రకటించారు.