లాటరీలో రూ.796 కోట్ల జాక్‌పాట్‌

 చైనా వ్యాపారవేత్త అదృష్టం

బీజింగ్‌: పదో, ఇరవై కోట్లో కాదు.. ఏకంగా రూ.796 కోట్ల జాక్‌పాట్‌ కొట్టేశాడు చైనాలోని గోయ్‌జో ప్రావిన్సుకు చెందిన వ్యాపారవేత్త. ఈ మొత్తాన్ని ప్రభుత్వం నిర్వహించే లాటరీలో గెలుచుకున్నాడు. మొత్తం 133 టికెట్లు కొన్నాడు. ఒక్కో టికెట్‌ ఖరీదు రెండు యువాన్లు (సుమారు రూ.24 రూపాయలు). ఈ టికెట్లకే ఆయనకు 680 మిలియన్‌ యువానులు (రూ.796 కోట్లు) లభించాయి. ‘‘ముందు నేను నమ్మలేదు. ఒకటికి పది సార్లు నెగ్గానన్న విషయాన్ని రూఢీ చేసుకున్నాను. ఆ రోజు రాత్రి నాకు నిద్ర పట్టలేదు’’ అని ఆ వ్యక్తి పేర్కొన్నారు. విజేత పేరును నిర్వాహకులు వెల్లడించలేదు. చైనా ఆదాయపు పన్ను నిబంధనల ప్రకారం ఆ వ్యాపారవేత్త తాను నెగ్గిన సొమ్ములో ఐదో వంతు పన్ను చెల్లించాల్సి ఉంటుంది.