సిరియాపైకి ఇజ్రాయెల్‌ క్షిపణులు

డమాస్కస్‌ : ఇజ్రాయెల్‌-హమాస్‌ పోరు విస్తరిస్తోంది. బుధవారం ఉదయం ఇజ్రాయెల్‌ క్షిపణులు ఏకంగా సిరియా రాజధాని డమాస్కస్‌పై విరుచుకుపడ్డాయి. ఓ ఇరానియన్‌ పాఠశాల సమీపంలోని అపార్టుమెంటు లక్ష్యంగా దూసుకెళ్లాయి. 10 అంతస్తుల ఈ భవనంలో నాలుగో అంతస్తు దెబ్బతింది. దాడిలో ఇద్దరు మృతి చెందారని, ఆస్తినష్టం సంభవించిందని సిరియా జాతీయ టెలివిజన్‌ పేర్కొంది. గోలన్‌హైట్స్‌ నుంచి ఈ క్షిపణులు వచ్చినట్లు తెలిపింది. దాడిని ఇజ్రాయెల్‌ ధ్రువీకరించలేదు. 

గాజాలో మరో 67 మంది మృతి

గాజాలో ఇజ్రాయెల్‌ దాడులు కొనసాగుతున్నాయి. మంగళవారం రాత్రి నుంచి జరిగిన దాడుల్లో 67 మంది పాలస్తీనియన్లు మృతి చెందినట్లు గాజా ఆరోగ్య విభాగ అధికారులు తెలిపారు.  రఫా నగరంపైనా దాడులు జరిగాయని, ఇందులో ఒకే కుటుంబానికి చెందిన 8 మంది ప్రాణాలు కోల్పోయారని స్థానిక అధికారులు తెలిపారు.