పర్యాటక వీసాల నిరీక్షణ కాలాన్ని తగ్గిస్తాం

అమెరికా వెల్లడి

దిల్లీ: భారతీయులకు పర్యాటక వీసాల (బీ1, బీ2) జారీ ప్రక్రియలో ప్రస్తుత నిరీక్షణ సమయాన్ని తగ్గించేందుకు ప్రయత్నిస్తున్నామని యూఎస్‌ బ్యూరో కాన్సులర్‌ వ్యవహారాల సహాయ కార్యదర్శి రీనా బిట్టర్‌ తెలిపారు. ఈ వీసాకు వేచి ఉండే సమయం గతం కంటే 75 శాతం తగ్గిందని.. భవిష్యత్తులో ఇది మరింత మెరుగ్గా మారుతుందని పేర్కొన్నారు. చరిత్రలో ఎన్నడూ లేనంతగా భారతీయులు అమెరికాను సందర్శించే అవకాశం కలుగుతోందని తెలిపారు. ఓ వార్తా సంస్థకు ఆమె ఇంటర్వ్యూ ఇచ్చారు. ‘గత ఏడాది 14 లక్షల వీసా దరఖాస్తులను పరిష్కరించాం. ప్రస్తుతం పర్యాటక వీసాల్లో తప్పించి మిగిలిన వాటిలో వేచి ఉండే సమయం దాదాపుగా లేదు. 2022-23లో 2,68,923 మంది భారతీయ విద్యార్థులకు వీసాలిచ్చాం’ అని వెల్లడించారు.