మాల్దీవుల్లోకి ప్రవేశించిన చైనా పరిశోధక నౌక

భారత నౌకాదళం అభ్యంతరం

మాలె: భారత్‌తో దౌత్య వివాదం కొనసాగుతున్న వేళ చైనా అధునాతన పరిశోధక నౌక ‘షియాంగ్‌ యాంగ్‌ హాంగ్‌-03’ గురువారం మాల్దీవుల జలాల్లోకి ప్రవేశించింది. భారత్‌, శ్రీలంక, మాల్దీవులు కలిసి ‘దోస్తీ-16’ పేరుతో త్రైపాక్షిక విన్యాసాలు చేయడానికి సిద్ధమైన తరుణంలో ఈ పరిణామం చోటుచేసుకుంది. రాజధాని మాలె తీరంలో ఇది లంగరు వేసేందుకు సిద్ధమైనట్లు తెలుస్తోంది. హిందూ మహాసముద్రంలో పరిశోధనల పేరిట వచ్చిన ఈ నౌక ద్వారా ఇక్కడి సముద్ర జలాల్లో జలాంతర్గాముల సంచారానికి మార్గాలను గుర్తించే అవకాశం చైనాకు లభిస్తుందని భారత నౌకాదళ వర్గాలు అభిప్రాయం వ్యక్తంచేశాయి. ఇప్పటికే శ్రీలంక వెళ్లిన ఈ తరహా నౌకలు వాటి కార్యకలాపాలను ఇతర ప్రాంతాలకు కూడా విస్తరించాయి. దానిపై భారత్‌ ఆందోళన వ్యక్తంచేసింది. మాల్దీవులతో దౌత్య ఉద్రిక్తతల వేళ.. హిందూ మహాసముద్రంలో చైనా ప్రభావం విస్తరిస్తున్న నేపథ్యంలో ఈ పరిశోధక నౌక కదలికల్ని భారత్‌ నిశితంగా గమనిస్తోంది.