వంతెనను ఢీకొన్న నౌక.. నదిలో పడిన వాహనాలు

చైనాలో అయిదుగురి మృతి

బీజింగ్‌: చైనాలో అనూహ్యరీతిలో నదిపై వంతెనను కంటైనర్ల నౌక ఢీకొంది. గురువారం తెల్లవారుజామున జరిగిన ఈ ఘటనలో వంతెన రెండు ముక్కలుగా విడిపోయింది. అదే సమయంలో దానిపై వెళ్తున్న అయిదు వాహనాల్లో రెండు నదిలో, మూడు నేరుగా నౌకపై పడ్డాయి. అయిదుగురు మృతిచెందారు. గ్వాంగ్జూ నగరంలోని పెరల్‌ నదిపై ఈ ప్రమాదం చోటు చేసుకొంది. ఖాళీ కంటైనర్లతో కూడిన నౌక- ఫోష్‌మన్‌ నుంచి గ్వాంగ్జూ వైపు వెళ్తున్నన్నప్పుడు వంతెనను బలంగా ఢీకొంది. ఆ సమయంలో వంతెనపై వాహనాల రద్దీ తక్కువగా ఉంది. ప్రమాదం అనంతరం వంతెన స్తంభాల మధ్యే ఈ నౌక చిక్కుకుపోయింది. నదిలో పడిపోయిన బస్సులో డ్రైవర్‌ మాత్రమే ఉన్నారు. ప్రమాద మృతుల్లో ఆయనొకరు. నౌక కెప్టెన్‌ను పోలీసులు అదుపులోకి తీసుకొన్నారు. ఈ వంతెనను నౌకలు ఢీకొనే ముప్పు ఉండటంతో నిర్మాణంలో మార్పులు చేయాలని గతంలోనే నిర్ణయించారు. ఆ ప్రతిపాదన కార్యరూపం దాల్చలేదు.