నావల్నీ అంత్యక్రియలకూ అడ్డంకులు

హాజరయ్యేవారిని అరెస్టు చేస్తారేమో..!
యూరోపియన్‌ పార్లమెంటులో ఆయన సతీమణి యులియా ఆవేదన

మాస్కో: కొన్నిరోజుల క్రితం జైల్లో అనుమానాస్పద రీతిలో మరణించిన రష్యా ప్రతిపక్ష నాయకుడు అలెక్సీ నావల్నీ అంత్యక్రియలను రాజధాని మాస్కోలోని ఓ చర్చి సమీపంలో శుక్రవారం నిర్వహించనున్నారు. అధ్యక్షుడు పుతిన్‌ ఫెడరల్‌ అసెంబ్లీలో గురువారం ప్రసంగించనున్న నేపథ్యంలో అదే రోజున నావల్నీ అంత్యక్రియలు నిర్వహించాలని తొలుత నిర్ణయించామని, అయితే ఎన్ని ప్రయత్నాలు చేసినా శ్మశాన వాటికల నిర్వాహకులు అంతిమ సంస్కారాల నిర్వహణకు ముందుకు రాలేదని ఆయన ప్రతినిధులు తెలిపారు. ఇందుకు ప్రభుత్వ ఒత్తిడే కారణమని ఆరోపించారు. ఈ పరిస్థితుల నేపథ్యంలో శుక్రవారం అంత్యక్రియలు నిర్వహించనున్నట్లు తెలిపారు. మరోవైపు నావల్నీ సతీమణి యులియా నవాల్నయ బుధవారం యురోపియన్‌ పార్లమెంటులో ప్రసంగించారు. తన భర్త అంత్యక్రియలు శాంతియుతంగా జరగకుండా పోలీసులు అడ్డుకోవచ్చని, హాజరయ్యే వారిని అరెస్టు కూడా చేయొచ్చని ఆమె ఆందోళన వ్యక్తం చేశారు. తనకు అడ్డుగా ఉన్నవారిని ఏమైనా చేయడానికైనా పుతిన్‌ వెనుకాడడని, అందుకు తన భర్త మరణమే నిదర్శనమని ఆమె వ్యాఖ్యానించారు. పుతిన్‌ అరాచకాలకు అడ్డుకట్ట వేయాలంటే కొత్త ఆంక్షలు విధిస్తే సరిపోదని, వృవస్థీకృత నేర విధానాలపై గట్టిగా పోరాడాలని చట్ట సభ్యులను కోరారు.