ఇజ్రాయెల్‌ సైనిక స్థావరాలపై దాడి

20 క్షిపణులను ప్రయోగించిన హెజ్‌బొల్లా
కూల్చేశామని ఇజ్రాయెల్‌ వెల్లడి

జెరూసలెం: ఇజ్రాయెల్‌ సైనిక స్థావరాలపై మంగళవారం లెబనాన్‌లోని హెజ్‌బొల్లా మిలిటెంట్లు క్షిపణి దాడులు చేశారు. దాదాపు 20 క్షిపణులను హెజ్‌బొల్లా ప్రయోగించింది. అందులో ఒకటి వైమానిక నిర్వహణ వ్యవస్థకు సమీపంలో పడింది. మిగిలిన వాటిలో కొన్నింటిని కూల్చేశామని, మరి కొన్ని నిర్మానుష్య ప్రాంతంలో పడ్డాయని ఇజ్రాయెల్‌ సైన్యం ప్రకటించింది. ప్రతిగా లెబనాన్‌లోని మిలిటెంట్ల స్థావరాలపై దాడులు చేశామని వెల్లడించింది. తాము ఇజ్రాయెల్‌లోని మెరోన్‌ వైమానిక నిర్వహణ వ్యవస్థపై క్షిపణితో దాడి చేశామని హెజ్‌బొల్లా ప్రకటించింది. మరో దాడితో సాంకేతిక పరికరాలను ధ్వంసం చేశామని తెలిపింది. యెమెన్‌ తీరం సమీపంలోని ఎర్ర సముద్రంలో సరకు రవాణా నౌకపై మంగళవారం రాత్రి హూతీ రెబల్స్‌ దాడి చేశారు. హొడైడా తీరానికి 110 కిలోమీటర్ల దూరంలో ఈ దాడి జరిగిందని బ్రిటన్‌ సైన్యం వెల్లడించింది. అయితే నౌకకు ఎలాంటి నష్టం జరగలేదని, తదుపరి గమ్యానికి అది వెళ్తోందని తెలిపింది. మరోవైపు మంగళవారం రాత్రి హూతీ రెబల్స్‌ ప్రయోగించిన 5 డ్రోన్లను కూల్చి వేశామని అమెరికా సైన్యం సెంట్రల్‌ కమాండ్‌ వెల్లడించింది. యెమెన్‌ నుంచి ఈ డ్రోన్లు వచ్చాయని తెలిపింది.