బంగ్లాదేశ్‌లో ఘోర అగ్నిప్రమాదం.. 46 మంది మృతి

22 మందికి తీవ్రగాయాలు

ఢాకా: బంగ్లాదేశ్‌ రాజధాని ఢాకాలో గురువారం రాత్రి ఘోర అగ్నిప్రమాదం చోటుచేసుకుంది. బెయిలీ రోడ్డులో రెస్టారెంట్లు, దుకాణాలకు నెలవైన ఓ ఏడంతస్తుల భవనంలో మంటలు చెలరేగి 46 మంది ప్రాణాలు కోల్పోయారు. మరో 22 మంది గాయపడినట్లు అధికారులు శుక్రవారం ప్రకటించారు. వారి పరిస్థితి విషమంగా ఉంది. భవనం మొదటి అంతస్తులోని ఓ రెస్టారెంటులో గ్యాస్‌ సిలిండర్‌ పేలడం వల్లే మంటలు మొదలై అగ్నికీలలు పైఅంతస్తులకు వ్యాపించాయని అధికారులు తెలిపారు. మంటల్లో సజీవ దహనమై కొందరు, దట్టమైన పొగతో ఊపిరాడక మరికొందరు, ప్రాణభయంతో భవనం పై నుంచి దూకి ఇంకొందరు ప్రాణాలు కోల్పోయినట్లు పేర్కొన్నారు.