సంక్షిప్త వార్తలు(3)

యూఏఈ హిందూ ఆలయంలో భక్తజన సందోహం ఆరంభం

అబుధాబి: యూఏఈలో నిర్మించిన అతి పెద్ద హిందూ ఆలయాన్ని భక్తుల కోసం సోమవారం తెరిచారు. రూ.700 కోట్లతో నిర్మించిన ఈ మందిరాన్ని గత నెలలో ప్రధాన మంత్రి నరేంద్ర మోదీ ప్రారంభించిన సంగతి తెలిసిందే. సోమవారం మినహా అన్ని రోజుల్లో ఉదయం 9 గంటల నుంచి రాత్రి 8 గంటల మధ్య భక్తులు ఈ ఆలయాన్ని దర్శించుకోవచ్చని బీఏపీఎస్‌ హిందూ మందిర్‌ తెలిపింది.

టెక్సాస్‌లో ఆగని మంటలు.. ఇద్దరు మహిళల మృతి

టెక్సాస్‌: అమెరికాలోని టెక్సాస్‌ రాష్ట్రంలో మొదలైన మంటలు ఇద్దరు మహిళలను బలి తీసుకున్నాయి. మంటల్లో అతిపెద్దదైన స్మోక్‌హౌస్‌ క్రీక్‌ ఫైర్‌ ప్రతి నిమిషానికి మరింత వేగంగా విస్తరిస్తోంది. ఇది రాష్ట్రంలో దాదాపు 4 వేల చదరపు కి.మీ. మేర వ్యాపించినట్లు అధికారులు తెలిపారు. ఒక్లహామా రాష్ట్రంలోనూ దాదాపు 32వేల ఎకరాలను మంటలు బూడిద చేశాయి. ఈ మంటల కారణంగా సుమారు 16 వందల కుటుంబాలు తమ ఇళ్లను ఖాళీ చేశాయి. బాధితులకు అండగా ఉన్నామని, వారికి అన్ని విధాలా సాయం అందిస్తామని అమెరికా అధ్యక్షుడు బైడెన్‌ హామీఇచ్చారు.

ఇరాన్‌లో పోలింగ్‌ ప్రారంభం

దుబాయ్‌: ఇరాన్‌లో శుక్రవారం ఉదయం పార్లమెంటరీ ఎన్నికలకు పోలింగ్‌ మొదలైంది. 6.1 కోట్ల మంది ఓటర్లు 290 మంది పార్లమెంటు సభ్యులను ఎన్నుకుంటారు. శనివారం నుంచి ఫలితాలు వెల్లడవుతాయి. ఈ ఎన్నికల్లో 15,000 మంది అభ్యర్థులు బరిలో ఉన్నారు. మత రాజ్యంలో సమూల సంస్కరణలు రావాలని డిమాండు చేసే వారిని ఈ ఎన్నికల్లో నిషేధించారు. ఇరాన్‌ పార్లమెంటు పదవీ కాలం నాలుగేళ్లు. మతపరమైన మైనారిటీ వర్గాలకు 5 సీట్లు కేటాయించారు. గడచిన రెండు దశాబ్దాలుగా ఇరాన్‌ పార్లమెంటులో అతివాదులదే పైచేయి.