పోలీసు పహారా నడుమ నావల్నీ అంత్యక్రియలు

మాస్కో: జైల్లో అనుమానాస్పద స్థితిలో మృతిచెందిన రష్యా విపక్ష నాయకుడు అలెక్సీ నావల్నీ అంత్యక్రియలు శుక్రవారం మాస్కోలో ముగిశాయి. భారీ పోలీసు పహారా నడుమ నిర్వహించిన అంత్యక్రియలకు వేల మంది హాజరయ్యారు. తమ అభిమాన నాయకుడికి తుది వీడ్కోలు పలికారు. మారినో డిస్ట్రిక్ట్‌లోని ఓ చర్చిలో నావల్నీ భౌతికకాయాన్ని ఉంచగా.. నివాళులు అర్పించేందుకు పాశ్చాత్య దేశాల దౌత్యవేత్తలు భారీగా క్యూ కట్టారు. అనంతరం అక్కడికి సమీపంలోని బోరిసోవ్‌స్కోయ్‌ శ్మశానవాటికలో ఖనన ప్రక్రియను పూర్తిచేశారు. గత నెల 16న నావల్నీ మరణించిన సంగతి తెలిసిందే. మరోవైపు- నావల్నీ భౌతికకాయాన్ని శ్మశానవాటికకు తరలించేందుకు తొలుత వాహన చోదకులెవరూ ముందుకు రాలేదని ఆయన బృంద ప్రతినిధి కీరా యార్మిష్‌ తెలిపారు. కొందరు డ్రైవర్లు సంసిద్ధత వ్యక్తం చేయగా.. వారికి బెదిరింపు ఫోన్లు వచ్చాయని ఆరోపించారు.