Xi Jinping: ‘మనది బలమైన బంధం’.. పాకిస్థాన్‌ కొత్త అధ్యక్షుడికి జిన్‌పింగ్‌ అభినందనలు

బీజింగ్‌: పాకిస్థాన్‌ 14వ అధ్యక్షుడిగా పాకిస్థాన్‌ పీపుల్స్‌ పార్టీ(PPP) సహ ఛైర్మన్‌ ఆసిఫ్‌ అలీ జర్దారీ (Asif Ali Zardari) ఎన్నిక కావడంపై చైనా హర్షం వ్యక్తం చేసింది. చైనా అధ్యక్షుడు షీ జిన్‌పింగ్ (Xi Jinping) జర్దారీకి శుభాకాంక్షలు తెలియజేశారు. ఇరు దేశాల మధ్య బలమైన బంధం ఉందన్నారు.

‘‘చైనా, పాకిస్థాన్‌ రెండు బలమైన మిత్ర దేశాలు. తమ దేశాల ప్రయోజనాలు, సమస్యలపై ఒకరికొకరు తోడుగా నిలిచారు. చైనా- పాకిస్థాన్‌ ఎకనామిక్‌ కారిడార్‌ (CPEC) నిర్మాణంలో మెరుగైన ఫలితాల్ని సాధించాం. ద్వైపాక్షిక సంబంధాలు ఉన్నత స్థాయికి చేరాయి’’ అని జిన్‌పింగ్‌ అన్నారు. ఇరు దేశాల స్నేహాన్ని మరింత బలోపేతం చేసేందుకు అధ్యక్షుడు జర్దారీతో కలిసి పనిచేయడానికి సిద్ధంగా ఉన్నానని పేర్కొన్నారు. తాజాగా పాక్‌ ప్రధానిగా ఎన్నికైన షెహబాజ్‌ షరీఫ్‌కు జిన్‌పింగ్‌ శుభాకాంక్షలు తెలియజేశారు.