ఆ తండ్రికి రూ.వందల కోట్ల ఆస్తి.. సామాన్యుడిలా పెరిగిన కుమారుడు

ఇంటర్నెట్‌ డెస్క్‌: మనిషి సాధారణ వ్యక్తిగా పెరిగితేనే జీవితంలో విజయం సాధించడం కోసం కష్టపడి పనిచేస్తాడనేది జాంగ్‌ యుడాంగ్‌ అభిప్రాయం. చైనాలో ప్రముఖ చిరుతిండ్ల బ్రాండ్‌ ‘మాలా ప్రిన్స్‌’ వ్యవస్థాకుడు ఈయన. ఏటా రూ.690 కోట్ల వ్యాపార టర్నోవరు గల యుడాంగ్‌.. తనకున్న రూ.వందల కోట్ల ఆస్తుల విషయం కుమారుడు జాంగ్‌ జిలాంగ్‌కు తెలియకుండా దాచారు. అతడికి 20 ఏళ్లు వచ్చాకే తమ సంపద గురించి తండ్రి వెల్లడించారు. దీనిపై జాంగ్‌ జిలాంగ్‌ ఇటీవల మీడియాతో మాట్లాడుతూ..‘‘నాన్న స్థాపించిన బ్రాండ్‌ గురించి తెలిసినప్పటికీ, వ్యాపారం అప్పుల్లో ఉందని తరచూ చెప్పేవారు. పింగ్‌జియాంగ్‌ కౌంటీలోని ఒక మధ్యతరగతి ఇంట్లో నా జీవితం సాగింది. కుటుంబం పేరు ఉపయోగించకుండా విద్యాభ్యాసం పూర్తిచేశా. గ్రాడ్యుయేషను తర్వాత అప్పులు తీర్చేందుకు ఒక మంచి ఉద్యోగం చూసుకోవాలనుకొన్నా. ఆ సమయంలో నాన్న అసలు విషయం చెప్పారు’ అన్నాడు. ఈ రహస్యం బయటపడిన తర్వాతే యుడాంగ్‌ కుటుంబం ఖరీదైన విల్లాలోకి మారింది.