రష్యాలో రెచ్చిపోయిన ఉగ్రవాదుల్ని ముందే గుర్తించిన తుర్కియే!

మాస్కో: సంగీత కచేరీపై జరిగిన ఉగ్రదాడి ఘటనలో మాస్కోలో మృతిచెందినవారి సంఖ్య 140కి చేరింది. గత శుక్రవారం జరిగిన ఘోరంలో గాయపడి ఆసుపత్రిలో చికిత్స పొందుతున్నవారిలో మరో వ్యక్తి బుధవారం ప్రాణాలు కోల్పోయారు. ఉగ్రదాడికి పాల్పడిన ఉగ్రవాదుల్లో ఇద్దరు (ఫరీదుని, రచబలిజోడా) ఈ ఏడాది ప్రారంభంలో రష్యాలోనే కొన్నిరోజులు గడిపినట్లు గుర్తించారు. రచబలిజోడా జనవరి 5న, ఫరీదుని ఫిబ్రవరి 20న తుర్కియేలోకి ప్రవేశించారు. వీరిద్దరూ కలిసి మార్చి 2న తుర్కియే నుంచి రష్యాకు బయలుదేరారు. వీరి కదలికలను ఆ దేశ నిఘా విభాగాలు గుర్తించినప్పటికీ, అరెస్టు వారెంట్‌ లేకపోవడం వల్ల అదుపులోకి తీసుకోలేదని వెల్లడైంది. దాడికి ఐఎస్‌ ఉగ్రవాదులే పాల్పడినట్లు తమకు నిఘావర్గాల సమాచారం ఉందని ఫ్రాన్స్‌ అధ్యక్షుడు ఇమ్మాన్యుయేల్‌ మెక్రాన్‌ తెలిపారు. దాడికి తమదే బాధ్యత అని ఇస్లామిక్‌ స్టేట్‌-ఖొరాసన్‌ (ఐసిస్‌-కే) ప్రకటించినా రష్యా అధ్యక్షుడు పుతిన్‌ ఎందుకు నమ్మడం లేదనేదానిపై పెద్దచర్చ నడుస్తోంది.