ఇద్దరి మృతదేహాల వెలికితీత

అమెరికా వంతెన కూలిన ఘటనలో ముమ్మరంగా సహాయక చర్యలు
వంతెన నిర్మాణానికి 18 నెలల నుంచి 3 సంవత్సరాలు

బాల్టిమోర్‌: అమెరికాలోని బాల్టిమోర్‌లో నౌక ఢీకొని వంతెన కూలిన ప్రమాదంలో గల్లంతైన ఆరుగురిలో ఇద్దరి మృతదేహాలను బుధవారం సహాయక సిబ్బంది వెలికితీశారు. మిగిలిన వారి కోసం గాలిస్తున్నారు. వారూ చనిపోయినట్లేనని అధికారులు భావిస్తున్నారు. చనిపోయిన ఇద్దరిలో ఒకరు మెక్సికో, మరొకరు గ్వాటెమాలాకు చెందినవారు. మరోవైపు వంతెన కూలడంవల్ల సముద్ర, రోడ్డు మార్గాలకు అంతరాయం కలుగుతోంది. దీనివల్ల స్థానికంగా తప్పితే అంతర్జాతీయ రవాణాకు ఎటువంటి ఇబ్బంది కలగకపోవచ్చని నిపుణులు చెబుతున్నారు. ఇప్పటికే సమీపంలోని ప్రత్యామ్నాయ పోర్టులకు నౌకలను మళ్లించినట్లు వెల్లడించారు. బాల్టిమోర్‌ పోర్టు నుంచి అధికంగా బొగ్గు, కొత్త వాహనాల రవాణా జరుగుతుంటుంది. పోర్టులో 8,000 మంది పని చేస్తున్నారు. పోర్టు కార్యకలాపాలు సాధారణ స్థితికి చేరుకోవడానికి 3 నెలల నుంచి 6 నెలలు పట్టవచ్చని అధికారులు తెలిపారు. వంతెనను తిరిగి నిర్మించడానికి 18 నెలల నుంచి 3ఏళ్ల వరకూ పట్టవచ్చని వెల్లడించారు.