ఉక్రెయిన్‌పై కొనసాగుతున్న దాడులు

ఇద్దరి మృతి

కీవ్‌: ఉక్రెయిన్‌లోని విద్యుత్కేంద్రాలపై రష్యా దాడులు కొనసాగుతున్నాయి. లవీవ్‌ ప్రాంతంలో మాస్కో ప్రయోగించిన క్రూజ్‌ క్షిపణి ఒకరి ప్రాణాలను బలిగొంది. ఈశాన్య ఉక్రెయిన్‌లో జరిగిన దాడిలో మరో వ్యక్తి మృతి చెందారు. విద్యుత్కేంద్రాలు పనిచేయకపోవడంతో ఒడెసాలోని చాలా ప్రాంతాల్లో అంధకారం అలముకుంది. లక్షా 70 వేల గృహాలు చీకట్లో మగ్గుతున్నాయి. రష్యా ప్రయోగించిన 14 క్రూజ్‌ క్షిపణుల్లో తొమ్మిదింటిని, 11 డ్రోన్లలో తొమ్మిదింటిని కూల్చివేశామని ఉక్రెయిన్‌ వాయుసేన తెలిపింది. మరోవైపు వందలాది సైనిక వాహనాలను వచ్చే ఏడాది ఉక్రెయిన్‌కు అందజేస్తామని ఫ్రాన్స్‌ తెలిపింది. సాయుధ బలగాలను త్వరగా తరలించేందుకు ఇవి ఉపయోగపడతాయని పేర్కొంది.