అమెరికాలో మరోసారి.. వంతెనను ఢీకొన్న పెద్ద పడవ

ఇంటర్నెట్‌ డెస్క్‌: అమెరికాలో వారం రోజుల కిందట ఆరుగురి ప్రాణాలు బలిగొన్న బాల్టిమోర్‌ వంతెన ప్రమాదాన్ని మరిచిపోకముందే అలాంటిదే మరో ఘటన చోటుచేసుకొంది. అయితే, ఈ ప్రమాదంలో ఎలాంటి ప్రాణనష్టం జరగలేదు. స్థానిక కాలమానం ప్రకారం శనివారం ఓక్లహామాలోని ఆర్కన్సాస్‌ నదిపై ఉన్న వంతెనను ఓ బార్జ్‌ (భారీ వాహనాలను తరలించే పడవ) ఢీకొంది. దీంతో ఒక్కసారిగా అప్రమత్తమైన స్థానిక పెట్రోలింగ్‌ బృందాలు సాల్లిసా హైవే దక్షిణ భాగాన్ని మూసివేసి, రాకపోకలను వేరే దారిలోకి మళ్లించాయి. ఈ ప్రమాదంలో బార్జ్‌ దెబ్బతినగా.. వంతెన పరిస్థితిని అధికారులు అంచనా వేస్తున్నారు. ప్రమాదానికి దారి తీసిన కారణాలు తెలియరాలేదు.