ప్రధాని దిగాలని.. విమానాన్ని దారి మళ్లించారు

పాకిస్థాన్‌లో ఘటన

లాహోర్‌: పాక్‌ ప్రధాని షెహబాజ్‌ షరీఫ్‌ దిగడం కోసం విమానాన్ని దారి మళ్లించడంతో వందల మంది ప్రయాణికులు అవస్థలు పడ్డారు. ఆర్థిక ఇబ్బందుల దృష్ట్యా పాక్‌ సర్కారు.. ఖర్చులు తగ్గించుకోవడంపై దృష్టి పెట్టింది. ఇందులో భాగంగానే ప్రధాని కూడా సామాన్య ప్రయాణికుల విమానంలోనే ప్రయాణిస్తున్నారు. ఇటీవల షెహబాజ్‌ సౌదీ అరేబియా పర్యటనకు వెళ్లారు. పర్యటన ముగించుకుని తిరిగి వస్తుండగా.. ప్రధాని దిగడం కోసం ఇస్లామాబాద్‌ వెళ్లాల్సిన విమానాన్ని లాహోర్‌ వైపు దారి మళ్లించినట్లు పాక్‌ మీడియా కథనాలు పేర్కొన్నాయి. జెడ్డా నుంచి ఇస్లామాబాద్‌ వెళ్లే విమానంలో ప్రధాని, ఆయన బృందం ప్రయాణించింది. వీరితో పాటు విమానంలో మొత్తం 393 మంది ప్రయాణికులున్నారు. వాస్తవానికి ఈ విమానం సోమవారం రాత్రి 10.30 గంటలకు ఇస్లామాబాద్‌లో దిగాల్సిఉంది. అయితే, దాన్ని దారి మళ్లించడంతో రాత్రి 9.25 గంటలకే విమానం లాహోర్‌ విమానాశ్రయంలో దిగింది. అనంతరం రాత్రి 11.17 గంటలకు విమానం అసలైన గమ్యస్థానానికి చేరుకుంది.