భారత్‌తో సుస్థిర సంబంధాలు ఇరుదేశాలకు మేలు: చైనా

బీజింగ్‌: చైనా-భారత్‌ల మధ్య బలమైన, సుస్థిర సత్సంబంధాలు ఇరు దేశాల ఉమ్మడి ప్రయోజనాలకు మేలు చేస్తాయని చైనా గురువారం పేర్కొంది. సరిహద్దు సమస్య అనేది రెండింటి మధ్య ఉన్న పూర్తి సంబంధాలను ప్రతిబింబించదని చైనా విదేశాంగశాఖ ప్రతినిధి మావో నింగ్‌ పేర్కొన్నారు. భారత్‌, చైనాల మధ్య స్థిరమైన, శాంతియుత సంబంధాలు ఈ ప్రాంతానికే కాదు, ప్రపంచానికీ కీలకమని ప్రధాని నరేంద్ర మోదీ న్యూస్‌ వీక్‌ మేగజీన్‌కు ఇచ్చిన ఇంటర్వ్యూలో పేర్కొన్న నేపథ్యంలో బీజింగ్‌ పై మేరకు స్పందించింది.  ‘‘ప్రధాని మోదీ వ్యాఖ్యలను గుర్తించాం. ఇరుదేశాల మధ్య మంచి, స్థిరమైన సంబంధాలు.. ఉమ్మడి ప్రయోజనాలకు, ప్రాంతీయంగా, అంతర్జాతీయంగా శాంతిస్థాపన, అభివృద్ధికి దోహదపడతాయి. సరిహద్దు వివాదాన్ని సరైన రీతిలో పరిష్కరించుకోవాలి. దౌత్య, సైనిక మార్గాల్లో ఇరుపక్షాలు ఇప్పటికే సంప్రదింపులు జరుపుతున్నాయి. వ్యూహాత్మక, దీర్ఘకాలిక కోణంలో ద్వైపాక్షిక సంబంధాల నిర్వహణ, పరస్పర విశ్వాసం, సహకారం, సంప్రదింపులు, విభేదాల పరిష్కారం విషయంలో మాతో భారత్‌ కలిసివస్తుందని ఆశిస్తున్నాం’’ అని మావో నింగ్‌ తెలిపారు.