60% ప్లాస్టిక్‌ కాలుష్యానికి 12 దేశాలే కారణం

దిల్లీ: శుద్ధిచేసి పునర్వినియోనికి వీలుగా మార్చకపోవడం వల్ల ప్లాస్టిక్‌ చెత్త కొండలుగా పేరుకుపోతోంది. ఇలాంటి అధ్వాన నిర్వహణ వల్ల ప్రపంచంలో పెరిగిపోయిన ప్లాస్టిక్‌ కాలుష్యంలో 60 శాతానికి 12 దేశాలే కారణమని స్విట్జర్లాండ్‌కు చెందిన ‘ఈఏ ఎర్త్‌ యాక్షన్‌’ సంస్థ వెల్లడించింది. ఆ 12 దేశాల జాబితాలో అమెరికా, చైనా, భారత్‌, రష్యా, బ్రెజిల్‌, మెక్సికో, పాకిస్థాన్‌, ఇరాన్‌, ఈజిప్ట్‌, ఇండోనేసియా, తుర్కియే, వియత్నాం ఉన్నాయి. ఇతర దేశాలతో పోలిస్తే భారత్‌లో ఏటా శుద్ధి చేయని తలసరి ప్లాస్టిక్‌ వ్యర్థాలు 8 కిలోలు మాత్రమే. ఇది అమెరికా వ్యర్థాలలో మూడో వంతు, చైనా వ్యర్థాలలో అయిదో వంతు కన్నా తక్కువ. భారత్‌లో శుద్ధి చేయకుండా వదిలేసే ప్లాస్టిక్‌ వ్యర్థాలు 2024లో 74 లక్షల టన్నులకు చేరతాయని అంచనా. ప్రపంచంలో ఈ ఏడాది 22 కోట్ల టన్నుల ప్లాస్టిక్‌ వ్యర్థాలు ఉత్పన్నం కాగా, అందులో 7 కోట్ల టన్నులను శుద్ధి చేయకుండా వదిలేయడం వల్ల పర్యావరణానికి హాని కలుగుతోంది. ప్లాస్టిక్‌ కాలుష్య నివారణను చట్టపరమైన బాధ్యతగా నిర్వచించాలని ప్రపంచ నాయకులు భావిస్తున్నారు. ఈ అంశంపై కెనడాలోని ఒట్టావాలో ఐక్యరాజ్యసమితి అనుబంధ కమిటీ త్వరలో సమావేశమవుతుంది. దానికి ముందే స్విస్‌ సంస్థ నివేదిక విడుదల చేసింది.