ఆస్ట్రేలియాలో మరో కత్తిదాడి

చర్చిలో బిషప్‌పై హత్యాయత్నం

సిడ్నీ: ఆస్ట్రేలియాలోని సిడ్నీ వెస్ట్‌ఫీల్డ్‌ షాపింగ్‌ మాల్‌లో ఆరుగురిని బలితీసుకున్న కత్తిదాడిని మరవకముందే నగరంలో మరో ఘటన చోటుచేసుకుంది. సోమవారం సాయంత్రం సబర్బన్‌ వెక్లిలోని ‘క్రీస్ట్‌ ది గుడ్‌ షెపర్డ్‌’ చర్చిలో సేవలు అందిస్తున్న ఓ బిషప్‌పై గుర్తుతెలియని వ్యక్తి కత్తితో దాడిచేశాడు. తల, శరీరం పైభాగంలో పదేపదే పొడిచి గాయపరిచాడు. అకస్మాత్తుగా జరిగిన ఈ ఘటనతో భయభ్రంతులైన చర్చిలోని వారంతా కేకలు వేస్తూ బిషప్‌కు సాయంగా వెళ్లడం ఓ వీడియోలో కనిపించింది. దాడిలో బిషప్‌తోపాటు మరో ముగ్గురు గాయపడ్డారని... వారందరి ఆరోగ్యం నిలకడగా ఉందని పోలీసులు తెలిపారు. నిందితుడిని అదుపులోకి తీసుకున్నట్లు ప్రకటించారు. బిషప్‌ను సి మేరీ ఇమ్యాన్యుయెల్‌గా చర్చి ప్రకటించింది. కాగా ఎల్జీబీటీక్యూ సంఘానికి వ్యతిరేకంగా బిషప్‌ చేసిన ఓ ప్రసంగాన్ని గతేడాది మేలో ఓ ప్రముఖ మీడియా సంస్థ పోస్టు చేయడం గమనార్హం.