రుణం కోసం మృతదేహాన్ని బ్యాంకుకు తీసుకొచ్చి..

ఇంటర్నెట్‌ డెస్క్‌: బ్యాంకు రుణం కోసం కొందరు తప్పుడు మార్గాలు వెతుకుతుంటారు. నకిలీ దస్త్రాలు సృష్టించి రుణం పొందేందుకు ప్రయత్నించిన దాఖలాలు ఉన్నాయి. కానీ, బ్రెజిల్‌కు చెందిన ఓ యువతి మాత్రం చనిపోయిన వ్యక్తిని బ్రతికున్నాడంటూ వీల్‌చైర్‌లో కూర్చోబెట్టి బ్యాంకుకు తీసుకువెళ్లింది. వివరాల్లోకి వెళితే..బ్రెజిల్‌కు చెందిన 42 ఏళ్ల ఎరికా డిసౌజా వియెరా నూనెస్‌ తన సమీప (చనిపోయిన) బంధువు పాలో రాబర్టో బ్రాగా (68)ను రియో డి జనీరోలోని ఓ బ్యాంకుకు తీసుకుని వెళ్లింది. అతడితో మాట్లాడుతూ ఆ వ్యక్తి పరిస్థితిపై అధికారులకు అనుమానం రాకుండా జాగ్రత్త పడింది. 3,250 డాల్లర్ల (రూ.2.70 లక్షలకు పైగా) రుణం పొందేందుకు ఏమాత్రం కదలిక లేని బ్రాగాతో పత్రాలపై సంతకం చేయించేందుకు ప్రయత్నించింది. సిబ్బందికి అనుమానం రావడంతో ఆమె బండారం బయటపడింది. ఎరికా తీసుకొచ్చింది మృతదేహాన్ని అని తెలిసి అక్కడున్నవారంతా కంగుతిన్నారు. వెంటనే పోలీసులకు సమాచారం అందించారు. అనంతరం మృతదేహాన్ని పోస్టుమార్టానికి తరలించారు. ఈ వ్యవహారంపై విచారణ కొనసాగుతున్నట్లు తెలుస్తోంది. ఇందుకు సంబంధించిన వీడియో కూడా సోషల్‌ మీడియాలో వైరల్‌గా మారింది.