ఇండోనేసియాలో అగ్నిపర్వత భారీ విస్ఫోటం

అంతర్జాతీయ విమానాశ్రయం మూసివేత

మనాడో: ఇండోనేసియాలో ఓ అగ్నిపర్వతం ఒక్క రోజులోనే 5 సార్లు విస్ఫోటం చెందింది. సులవేసి ద్వీపానికి ఉత్తరం వైపున ఉన్న మౌంట్‌ రువాంగ్‌లో బుధవారం విస్ఫోటం సంభవించింది. దీనిపై ప్రభుత్వం అత్యున్నత స్థాయి ప్రమాద హెచ్చరికలను జారీ చేసింది. అగ్నిపర్వతం నుంచి భారీగా వెలువడుతున్న పొగ, బూడిద సమీప ప్రాంతాలను కమ్మేసింది. అగ్నిపర్వతం నుంచి ప్రజలు కనీసం 6 కిలోమీటర్ల దూరంలో ఉండాలని అధికారులు సూచించారు. మనాడో అంతర్జాతీయ విమానాశ్రయాన్ని గురువారం నుంచి తాత్కాలికంగా మూసివేశారు. సుమారు 11వేల మంది ప్రజలను సురక్షిత ప్రాంతాలకు తరలిస్తున్నారు. మరోవైపు ఈ విస్ఫోటం వల్ల పర్వత భాగం సముద్రంలోకి కూలి సునామీ వచ్చే అవకాశం ఉందని దేశ జాతీయ విపత్తు నివారణ సంస్థ ప్రతినిధి ఒకరు ఆందోళన వ్యక్తం చేశారు.