పారిస్‌లోని ఇరాన్‌ దౌత్య కార్యాలయం వద్ద వ్యక్తి అరెస్టు

పారిస్‌: ఆయుధాలతో సంచరిస్తున్నాడన్న అనుమానంతో పారిస్‌లోని ఇరాన్‌ దౌత్య కార్యాలయం వద్ద ఓ వ్యక్తిని స్థానిక పోలీసులు శుక్రవారం అదుపులోకి తీసుకున్నారు. అంతకు ముందు ఓ అనుమానాస్పద వ్యక్తి గ్రెనేడ్‌, పేలుడు పదార్థాలతో సంచరిస్తున్నాడన్న సమాచారంతో కాన్సులేట్‌ భవనాన్ని పోలీసులు, సైనికులు పెద్దఎత్తున చుట్టుముట్టారు. అనుమానిత వ్యక్తిని అదుపులోకి తీసుకుని అరెస్టు చేశారు. అయితే అతని వద్ద, అతని వాహనంలో ఎటువంటి ఆయుధాలు లేవని ఓ పోలీసు అధికారి వెల్లడించారు. అయితే అనుమానితుడు గతేడాది రాయబార కార్యాలయ ద్వారాలకు నిప్పుపెట్టిన కేసులో నిందితుడని పారిస్‌ ప్రాసిక్యూటర్‌ కార్యాలయం తెలిపింది. పశ్చిమాసియాలో ఉద్రిక్త పరిస్థితులు నెలకొన్న తరుణంలో, ఒలింపిక్స్‌కు పారిస్‌ ఆతిథ్యమివ్వనున్న నేపథ్యంలో ఈ సంఘటన చోటు చేసుకోవడంతో ఆందోళనలు తలెత్తాయి. ఈ పరిణామంపై ఇరాన్‌ రాయబార కార్యాలయం ఎటువంటి వ్యాఖ్యలు చేయలేదు.