సముద్రంలో కుప్పకూలిన రెండు హెలికాప్టర్‌లు

జపాన్‌లో ఒకరి మృతి, ఏడుగురు గల్లంతు

టోక్యో: జపాన్‌లో ఘోర ప్రమాదం చోటు చేసుకుంది. రాత్రివేళ ప్రత్యేక శిక్షణ నిమిత్తం వెళ్లిన రెండు నౌకాదళ హెలికాప్టర్‌లు సముద్రంలో కుప్పకూలిపోయాయి. శనివారం అర్ధరాత్రి చోటుచేసుకున్న ఈ దుర్ఘటనలో ఒకరు మరణించగా.. ఏడుగురు గల్లంతయ్యారు. వారి ఆచూకీ తెలుసుకోవడానికి సహాయక చర్యలు కొనసాగుతున్నాయి. రెండు హెలికాప్టర్‌లు ఒకదాన్నొకటి ఢీకొనడంతోనే ఈ ప్రమాదం జరిగిందని అధికారులు భావిస్తున్నారు. ఎస్‌హెచ్‌-60కె శ్రేణికి చెందిన ఈ హెలికాప్టర్‌లు టోరిషిమా ద్వీపం సమీపంలో కూలినట్లు జపాన్‌ నౌకాదళం ప్రకటించింది. ఘటనకు కారణం తెలిసే వరకు ఈ హెలికాప్టర్‌లపై శిక్షణ కార్యక్రమాలు నిలిపివేస్తున్నట్లు తెలిపింది. హెలికాప్టర్లు కూలిన ప్రాంతాన్ని 12 యుద్ధ నౌకలు జల్లెడ పడుతున్నాయి.