ఇక భారతీయులకు బహుళ ప్రవేశ, దీర్ఘకాల షెన్‌జెన్‌ వీసా

నిబంధనలను సరళీకరించిన ఈయూ

దిల్లీ: తరచూ ఐరోపా పర్యటనకు వెళ్లే భారతీయులకు శుభవార్త. ఇకపై వారు అయిదేళ్ల కాల పరిమితితో బహుళ ప్రవేశ షెన్‌జెన్‌ వీసా పొందొచ్చు. ఈ మేరకు ప్రస్తుతం అమల్లో ఉన్న నిబంధనలను ఐరోపా కమిషన్‌ సరళీకరించింది.  ‘‘భారతీయులకు బహుళ ప్రవేశ వీసాలకు సంబంధించి కొత్త నిబంధనలను ఐరోపా కమిషన్‌ ఆమోదించింది. ఇవి ప్రస్తుతం అమల్లో ఉన్న వీసా ప్రామాణిక నిబంధనల కంటే మరింత అనుకూలమైనవి’’ అని ఈయూ ఓ ప్రకటనలో తెలిపింది. ‘‘కొత్త నిబంధనల ప్రకారం.. గత మూడు సంవత్సరాల్లో రెండు వీసాలను పొంది, చట్టబద్ధంగా వినియోగించిన భారతీయులకు దీర్ఘకాల, బహుళ ప్రవేశ షెన్‌జెన్‌ వీసాలను రెండేళ్ల కాలపరిమితికి జారీ చేయవచ్చు. సాధారణంగా ఈ రెండేళ్ల వీసా తర్వాత సంబంధిత ప్రయాణికుడి పాస్‌పోర్ట్‌లో సరిపడినంత చెల్లుబాటు గడువు సమయం ఉన్నట్లైతే ఐదేళ్ల వీసా జారీచేస్తారు. ఈ వీసాల చెల్లుబాటు సమయంలో సంబంధిత వ్యక్తులు వీసా ఫ్రీ దేశాల జాతీయులతో సమానంగా ప్రయాణ హక్కులను పొందుతారు’’ అని వివరించింది. ప్రస్తుతం షెన్‌జెన్‌ పరిధిలో 29 ఐరోపా దేశాలు ఉన్నాయి. అందులో 25 ఈయూ దేశాలు.