కశ్మీర్‌ సమస్యను శాంతియుతంగా పరిష్కరించుకోవాలి

పాకిస్థాన్‌-ఇరాన్‌ ఉమ్మడి ప్రకటనలో వెల్లడి

ఇస్లామాబాద్‌, వాషింగ్టన్‌: కశ్మీర్‌ సమస్యను ఆ ప్రాంత ప్రజల అభీష్టానికి అనుగుణంగా శాంతియుతంగా పరిష్కరించుకోవాలని పాకిస్థాన్‌, ఇరాన్‌లు బుధవారం విడుదల చేసిన ఓ ఉమ్మడి ప్రకటనలో పేర్కొన్నాయి. ‘‘కశ్మీర్‌ సమస్యను ఆ ప్రాంత ప్రజల అభీష్టానికి, అంతర్జాతీయ చట్టాలకు అనుగుణంగా శాంతియుత మార్గాలు, చర్చల ద్వారా పరిష్కరించుకోవాల్సిన అవసరాన్ని ఇరు పక్షాలు నొక్కి  చెప్పాయి’’ అని వెల్లడించాయి. ఇరాన్‌ అధ్యక్షుడు ఇబ్రహీం రైసీ పాక్‌ మూడ్రోజుల పర్యటన ముగిసిన నేపథ్యంలో ఈ ప్రకటన వెలువడింది. ఫిబ్రవరి 8న పాక్‌లో ఎన్నికలు జరిగిన తర్వాత ఆ దేశంలో పర్యటించిన తొలి దేశాధినేత ఇబ్రహీం రైసీ కావడం గమనార్హం. ఉగ్రవాదంపై పోరాటానికి ఉమ్మడి వేదికను ఏర్పాటుచేయాల్సిన అవసరాన్ని గుర్తించినట్లు ఈ సందర్భంగా రెండు దేశాలు ప్రకటించాయి. ప్రాంతీయ శాంతికి, సుస్థిరతకు ఉగ్రవాదం ఉమ్మడి ముప్పుగా పరిణమించిందని, ఈ ప్రాంత అభివృద్ధికి పెద్ద ఆటంకంగా మారిందని పేర్కొన్నాయి. ఈ విపత్తును ఎదుర్కొనేందుకు సహకార విధానాన్ని అవలంబించాలని నిర్ణయించాయి.

ఇరాన్‌తో వాణిజ్య ఒప్పందాలు కుదుర్చుకుంటే ఆంక్షలే

-అమెరికా

ఇరాన్‌తో వాణిజ్య ఒప్పందాలను కుదుర్చుకునే ఏ దేశానికైనా ఆంక్షల ప్రమాదం పొంచి ఉన్నట్లేనని అమెరికా బుధవారం హెచ్చరించింది. పాక్‌ పర్యటనకు వచ్చిన ఇరాన్‌ అధ్యక్షుడు ఆ దేశంతో పలు ఒప్పందాలు కుదుర్చుకున్న నేపథ్యంలో అమెరికా ఈ హెచ్చరిక చేయడం గమనార్హం.  మరోవైపు, పెంటగాన్‌ మీడియా కార్యదర్శి ప్యాట్‌ రైడర్‌ మాట్లాడుతూ.. ‘‘పాక్‌తో అమెరికా సత్సంబంధాలు కొనసాగిస్తోంది. ఆ ప్రాంతంలో వారు మాకు కీలక భద్రతా భాగస్వామి’’ అని వ్యాఖ్యానించారు.