ఇండొనేసియా నూతన అధ్యక్షుడిగా ప్రబోవో సుబియాంతో

జకార్తా: ఇండొనేసియా నూతన అధ్యక్షుడిగా ప్రబోవో సుబియాంతో ఎన్నికైనట్లు ఆ దేశ ఎన్నికల సంఘం బుధవారం లాంఛనంగా ప్రకటించింది. ఆయన ఈ ఏడాది అక్టోబరులో బాధ్యతలు చేపట్టనున్నారు. సుబియాంతో ప్రస్తుతం ఇండొనేసియా రక్షణ మంత్రిగా ఉన్నారు. వాస్తవానికి అధ్యక్షుడిగా ఆయన ఎన్నికను గత నెల 20నే ఎన్నికల సంఘం ప్రాథమికంగా ప్రకటించింది. అధ్యక్ష ఎన్నికల్లో ఆయనకు 58.6% ఓట్లు వచ్చినట్లు తెలిపింది. అయితే అధ్యక్ష పదవికి పోటీ పడిన మరో ఇద్దరు నేతలు- అనీస్‌ బస్వెదన్‌, గంజర్‌ ప్రనోవో ఆ ప్రకటనను ఆక్షేపించారు. ఎన్నికల్లో తీవ్రస్థాయి అవకతవకలు చోటుచేసుకున్నాయని ఆరోపించారు. ప్రభుత్వం అనుచితంగా ఎన్నికల ప్రక్రియలో జోక్యం చేసుకుందని విమర్శించారు. సుబియాంతో ఎన్నికను దేశ అత్యున్నత న్యాయస్థానంలో సవాలు చేశారు. వారి పిటిషన్లను కోర్టు సోమవారం కొట్టివేసింది.