నరమేధానికి పాల్పడలేదు

అంతర్జాతీయ న్యాయస్థానంలో ఇజ్రాయెల్‌ వాదనలు

ది హేగ్‌ (నెదర్లాండ్స్‌): గాజాలో తాము నరమేధానికి పాల్పడుతున్నామన్న ఆరోపణలను ఇజ్రాయెల్‌ తిరస్కరించింది. పౌరుల భద్రత కోసం అన్ని రకాల చర్యలు చేపడుతున్నామని అంతర్జాతీయ న్యాయస్థానానికి (ఐసీజే) తెలిపింది. రెండో రోజైన శుక్రవారం ఇజ్రాయెల్‌పై దక్షిణాఫ్రికా మోపిన నరమేధం అభియోగాలపై విచారణ జరిగింది. ఇజ్రాయెల్‌ వాదనల సందర్భంగా ఓ మహిళ లేచి ‘అబద్ధాలకోరులు’ అని బిగ్గరగా అరిచింది. దీంతో విచారణకు కొంతసేపు అంతరాయం కలిగింది. ఈ సందర్భంగా దక్షిణాఫ్రికాపై ఇజ్రాయెల్‌ తీవ్రస్థాయిలో మండిపడింది. ఆ దేశం అవాస్తవాలను ప్రచారం చేస్తోందని ఆరోపించింది. గాజాకు తాము నిరంతరాయంగా, ఎలాంటి ఆటంకాలు లేకుండా మానవతా సాయాన్ని పంపిస్తున్నామని ఇజ్రాయెల్‌ న్యాయవాదులు పేర్కొన్నారు.  

అమెరికా ఎంక్యూ-9 ప్రిడేటర్‌ డ్రోన్‌ను కూల్చినట్లు శుక్రవారం యెమెన్‌లోని హూతీ తిరుగుబాటుదారులు ప్రకటించారు. గతంలో ఐదు డ్రోన్లను అమెరికా కోల్పోయింది.