తబ్రిజ్‌లో రైసీ సంతాప యాత్ర

నల్ల దుస్తులతో వేల మంది హాజరు
రేపు అంత్యక్రియలు

టెహ్రాన్‌: హెలికాప్టర్‌ దుర్ఘటనలో మృతి చెందిన అధ్యక్షుడు ఇబ్రహీం రైసీ, ఇతరుల స్మృత్యర్థం ఇరాన్‌ ప్రభుత్వం ప్రకటించిన సంతాప కార్యక్రమాలు ప్రారంభమయ్యాయి. హెలికాప్టర్‌ కుప్పకూలిన ప్రదేశానికి సమీపంలోని తబ్రిజ్‌ పట్టణంలో మంగళవారం శవపేటికలతో సంతాప యాత్ర జరిగింది. ఈ కార్యక్రమంలో నల్లదుస్తులతో, ఇరాన్‌ జెండాలు పట్టుకొని వేల సంఖ్యలో ప్రజలు పాల్గొన్నారు. శవపేటికలపైకి పూలు చల్లారు. రైసీ, విదేశాంగమంత్రి హొస్సేన్‌ అమిర్‌ అబ్దొల్లాహియన్‌ భౌతిక కాయాలను రాజధాని టెహ్రాన్‌కు తరలించనున్నారు. బుధవారం టెహ్రాన్‌లో భారీస్థాయిలో అంతిమ యాత్ర నిర్వహించనున్నారు. ఈ కార్యక్రమంలో ఇరాన్‌ సుప్రీం నేత ఖమేనీ పాల్గొని ప్రార్థనలు నిర్వహిస్తారు. తర్వాత రైసీ భౌతికకాయాన్ని ఆయన పుట్టి పెరిగిన మషాద్‌ నగరానికి తీసుకువెళతారు. గురువారం అక్కడే అంత్యక్రియలు ఘనంగా నిర్వహిస్తారు. 

ఇరాన్‌కు ఉపరాష్ట్రపతి ధన్‌ఖడ్‌

దిల్లీ: ఇరాన్‌ అధ్యక్షుడు ఇబ్రహీం రైసీకి, విదేశాంగ మంత్రి అబ్దొల్లాహియన్‌కు భారత్‌ తరఫున అధికారికంగా ఉపరాష్ట్రపతి జగదీప్‌ ధన్‌ఖడ్‌ నివాళులు అర్పించనున్నారు. ఈ మేరకు విదేశీ వ్యవహారాల మంత్రిత్వశాఖ మంగళవారం ఒక ప్రకటన విడుదల చేసింది. బుధవారం ధన్‌ఖఢ్‌ ఇరాన్‌ చేరుకుంటారని, హెలికాప్టర్‌ ప్రమాదంలో మృతి చెందిన నేతలిద్దరికీ భారత్‌ తరఫున నివాళులు అర్పిస్తారని తెలిపింది.