సింగపూర్‌ విమానంలో భారీ కుదుపులు

కుదుపులకు గురై థాయ్‌లాండ్‌ రాజధాని బ్యాంకాక్‌లో దిగిన సింగపూర్‌ ఎయిర్‌లైన్స్‌

బ్యాంకాక్‌: సింగపూర్‌ ఎయిర్‌లైన్స్‌కు చెందిన ఓ విమానం ఆకాశంలో తీవ్రమైన కుదుపునకు లోనవడంతో ఓ వ్యక్తి మరణించారు. మరో 30 మందికి పైగా ప్రయాణికులు గాయపడ్డారు. లండన్‌ నుంచి సింగపూర్‌ వెళ్తున్న ఎస్‌క్యూ321 విమానంలో మంగళవారం ఈ ఘటన జరిగినట్లు సింగపూర్‌ ఎయిర్‌లైన్స్‌ సంస్థ వెల్లడించింది. ఆ సమయంలో విమానంలో ముగ్గురు భారతీయులు సహా మొత్తం 211 మంది ప్రయాణికులు, 18 మంది సిబ్బంది ఉన్నట్లు తెలిపింది. మార్గమధ్యలో విమానం తీవ్ర కుదుపులకు లోనుకావడంతో దాన్ని థాయ్‌లాండ్‌ రాజధాని బ్యాంకాక్‌లోని సువర్ణభూమి విమానాశ్రయానికి మళ్లించినట్లు సంస్థ పేర్కొంది. ఈ ఘటనలో మృతిచెందిన వ్యక్తి కుటుంబానికి ప్రగాఢ సానుభూతి తెలియజేస్తున్నట్లు సింగపూర్‌ ఎయిర్‌లైన్స్‌ ప్రకటించింది. ప్రయాణికులకు అవసరమైన వైద్య సాయం అందించేందుకు థాయ్‌లాండ్‌ అధికారులతో కలిసి పనిచేస్తున్నామని, పరిస్థితిని పర్యవేక్షించేందుకు ఓ బృందాన్ని బ్యాంకాక్‌కు పంపుతున్నామని వివరించింది.