షెంజెన్‌ వీసా రుసుములను పెంచిన ఐరోపా

భారతీయులపై ప్రభావం చూపే అవకాశం  

ఇంటర్నెట్‌ డెస్క్‌: ఐరోపా పర్యటనకు వెళ్లాలనుకునే వారికి ప్రయాణ ఖర్చు మరింత భారం కానుంది. షెంజెన్‌ వీసా దరఖాస్తు రుసుంను 12 శాతం పెంచేందుకు యూరోపియన్‌ కమిషన్‌ ఆమోదించడమే అందుకు కారణం. జూన్‌ 11 నుంచి ఈ పెంపు ప్రపంచవ్యాప్తంగా అన్ని దేశాల పౌరులకు వర్తిస్తుందని స్లొవేనియా విదేశీ, ఐరోపా వ్యవహారాల మంత్రిత్వ శాఖ వెల్లడించింది. ఇప్పటివరకు పెద్దలకు షెంజెన్‌ వీసా దరఖాస్తు రుసుం 80 యూరోలు ఉండగా.. ఇప్పుడు దాన్ని 90 యూరోలకు పెంచారు. 6-12 ఏళ్ల పిల్లల దరఖాస్తు ఫీజును 40 యూరోల నుంచి 45 యూరోలు చేశారు. ద్రవ్యోల్బణం, ఉద్యోగుల వేతనాల పెంపు తదితర కారణాలతో ఈ వీసా రుసుంలను పెంచినట్లు యూరోపియన్‌ కమిషన్‌ తెలిపింది. చివరిసారిగా 2020 ఫిబ్రవరిలో ఈ వీసా ధరలను పెంచారు. 

ఏంటీ షెంజెన్‌?

షెంజెన్‌ అంటే 29 ఐరోపా దేశాల సమాఖ్య అని అర్థం. 90 రోజుల వరకు ఆయా దేశాల్లో పర్యటించేందుకు వీలుగా షెంజెన్‌ వీసాలను జారీ చేస్తుంటారు. ఏదైనా షెంజెన్‌ దేశం ఈ వీసాను జారీ చేస్తే.. దానిపై ఇతర షెంజెన్‌ దేశాల్లోనూ పర్యటించేందుకు అనుమతి లభిస్తుంది. ఇటలీ, ఆస్ట్రియా, బెల్జియం, బల్గేరియా, క్రొయేషియా, డెన్మార్క్, ఫ్రాన్స్, జర్మనీ, నెదర్లాండ్స్‌ తదితర దేశాలు ఈ కోవలోకి వస్తాయి. యూరప్‌నకు వీసా దరఖాస్తుల్లో భారత్‌ మూడో స్థానంలో ఉండటంతో ఈ రుసుంల పెంపు ప్రభావం మన వాళ్లపై ఎక్కువగానే ఉండనుంది.