ఉక్రెయిన్‌కు సమీపంలో రష్యా అణు విన్యాసాలు

మాస్కో: ఉక్రెయిన్‌కు సమీపంలో వ్యూహాత్మక అణ్వాయుధాలతో రష్యా సైనిక విన్యాసాలను ప్రారంభించింది. ఈ విషయాన్ని ఆ దేశ రక్షణ మంత్రిత్వశాఖ తెలిపింది. ‘‘రష్యా ప్రాదేశిక సమగ్రత, సార్వభౌమత్వాన్ని రక్షించుకోవడానికి వ్యూహాత్మక అణ్వాయుధ పోరాట యూనిట్ల సిబ్బంది, పరికరాల సంసిద్ధతను పరీక్షించడానికి ఈ విన్యాసాలను చేస్తున్నాం’’ అని ప్రకటనలో పేర్కొంది. విన్యాసాల్లో అణు వార్‌హెడ్లను మోసుకెళ్లే కింజల్, ఇస్కేండర్‌ క్షిపణులు కూడా పాల్గొంటున్నాయి. అవసరమైతే ఉక్రెయిన్‌కు తమ సైన్యాన్ని పంపుతామని ఫ్రాన్స్‌ అధ్యక్షుడు మేక్రాన్‌ ఇటీవల ప్రకటించిన నేపథ్యంలో మాస్కో ఈ విన్యాసాలు నిర్వహించడం గమనార్హం. బ్రిటన్‌ విదేశాంగ మంత్రి డేవిడ్‌ కామెరూన్‌ కూడా తాము సరఫరా చేసిన ఆయుధాలతో రష్యాలోని ప్రాంతాలపై కీవ్‌ దాడి చేయొచ్చని పేర్కొన్నారు. ఈ నేపథ్యంలో ఓ హెచ్చరికగానే ఈ అణువిన్యాసాలను మాస్కో నిర్వహిస్తోందని విశ్లేషకులు పేర్కొంటున్నారు.