15 గంటల్లోపే ఎవరెస్ట్‌ శిఖరంపైకి.. నేపాలీ మహిళ ఫుంజో లామా ప్రపంచ రికార్డు

కాఠ్‌మాండూ: ఎవరెస్ట్‌ శిఖరాన్ని 15 గంటల్లోపు అధిరోహించి నేపాలీ మహిళా పర్వతారోహకురాలు ఒకరు అత్యంత వేగంగా ఎవరెస్ట్‌ శిఖరాన్ని అధిరోహించిన మహిళగా ప్రపంచ రికార్డు సృష్టించారు. గూర్ఖా జిల్లాకు చెందిన ఫుంజో లామా బుధవారం మధ్యాహ్నం 3.52 గంటలకు బేస్‌క్యాంపు నుంచి పర్వతారోహణను ప్రారంభించారు. గురువారం ఉదయం 6.23 గంటలకు 8,848 మీటర్ల శిఖరాగ్రానికి చేరుకుని అతితక్కువ సమయంలో (14.31 గంటల్లో) ఎవరెస్ట్‌ శిఖరాన్ని అధిరోహించిన మహిళగా ప్రపంచ రికార్డు సృష్టించినట్లు నేపాల్‌ పర్యాటకశాఖ వర్గాలు తెలిపాయి. 2021లో హాంకాంగ్‌కు చెందిన అడా త్సాంగ్‌ యిన్‌-హంగ్‌ అనే మహిళ 25 గంటల 50 నిమిషాల్లో ఎవరెస్ట్‌ను అధిరోహించి రికార్డు సృష్టించారు. ఇప్పుడు ఫుంజో లామా ఆ రికార్డును తిరగరాశారు.