ఉక్రెయిన్‌కు 100 కోట్ల డాలర్ల సైనిక సాయం ప్రకటించిన బెల్జియం

బ్రస్సెల్స్‌: రష్యాతో యుద్ధంలో ఉక్రెయిన్‌కు బాసటగా నిలిచేందుకు బెల్జియం మరోసారి ముందుకొచ్చింది. ఈ ఏడాది ఆ దేశానికి 100 కోట్ల డాలర్ల సైనిక సాయం అందించనున్నట్లు ప్రకటించింది. ఉక్రెయిన్‌ అధ్యక్షుడు వొలొదిమిర్‌ జెలెన్‌స్కీ తమ దేశ పర్యటనలో ఉండగా బెల్జియం మంగళవారం ఈ మేరకు కీలక నిర్ణయాన్ని వెల్లడించింది. వచ్చే నాలుగేళ్లలో ఉక్రెయిన్‌కు 30 ఎఫ్‌-16 యుద్ధవిమానాలను అందజేయనున్నట్లు ఆ దేశం ఇదివరకే తెలిపింది. ఈ ఏడాది ఉక్రెయిన్‌కు వంద కోట్ల యూరోల సైనిక సాయం అందించనున్నట్లు స్పెయిన్‌ సోమవారం ప్రకటించిన సంగతి గమనార్హం. మరోవైపు- తమ భూభాగాలను తాకే సామర్థ్యమున్న దీర్ఘశ్రేణి ఆయుధాలను ఉక్రెయిన్‌కు పశ్చిమ దేశాలు అందిస్తే.. పరిస్థితులు మరింత ఉద్రిక్తంగా మారుతాయని రష్యా అధ్యక్షుడు వ్లాదిమిర్‌ పుతిన్‌ మంగళవారం ఉజ్బెకిస్థాన్‌ పర్యటనలో విలేకర్లతో మాట్లాడుతూ హెచ్చరించారు.