ఇరాన్‌పై అణుఇంధన సంస్థ అభిశంసన

వియెన్నా: దాదాపుగా ఆయుధ శ్రేణి స్థాయిలో శుద్ధిచేసిన యురేనియం నిల్వలను ఇరాన్‌ పెంచుకుంటోందన్న నివేదికల నేపథ్యంలో ఆ దేశాన్ని అభిశంసించాలని ‘అంతర్జాతీయ అణు ఇంధన సంస్థ’ (ఐఏఈఏ) నిర్ణయించింది. సంస్థకు ఏమాత్రం సహకరించకపోవడాన్ని తప్పుబట్టింది. అణు ఇంధనంపై చాలాకాలం నుంచి కొనసాగుతున్న విచారణకు సమాధానాలివ్వాలని, అనుభవజ్ఞులైన ఐరాస తనిఖీదారులపై విధించిన నిషేధాన్ని వెనక్కి తీసుకోవాలని విజ్ఞప్తి చేసింది. తీర్మానానికి అనుకూలంగా 22 దేశాలు ఓటువేశాయి. రష్యా, చైనా మాత్రం వ్యతిరేకించాయి. 12 దేశాలు ఓటింగుకు గైర్హాజరయ్యాయి. వియెన్నా కేంద్రంగా ఉన్న ఈ సంస్థకు, ఇరాన్‌కు మధ్య ఉద్రిక్తతలు తాజా తీర్మానంతో మరింత పెరిగే అవకాశం ఉందని భావిస్తున్నారు. గతంలోనూ ఇలాంటివాటిపై ఇరాన్‌ మండిపడింది.