భద్రతా మండలికి పాక్, డెన్మార్క్, గ్రీస్, పనామా, సోమాలియా

రెండేళ్ల పాటు కొనసాగనున్న సభ్యత్వాలు

ఐక్యరాజ్యసమితి: భద్రతా మండలిలో రెండేళ్ల సభ్యత్వం కోసం గురువారం జరిగిన రహస్య బ్యాలట్‌లో పాకిస్థాన్, డెన్మార్క్, గ్రీస్, పనామా, సోమాలియాలు గెలుపొందనున్నాయి. 193 సభ్య దేశాలు గల ఐరాస జనరల్‌ అసెంబ్లీ ఈ అయిదు దేశాలను ఎంపిక చేయడం ఖాయమే. భద్రతామండలిలో మొత్తం 15 సీట్లు ఉండగా, వాటిలో అయిదు వీటో అధికారం గల శాశ్వత సభ్య దేశాలు. అవి- అమెరికా, రష్యా, చైనా, బ్రిటన్, ఫ్రాన్స్‌. మిగతా 10 దేశాలను రెండేళ్లపాటు తాత్కాలిక సభ్యులుగా ఎన్నుకుంటారు. ఈ సీట్లను ప్రాంతాల వారీగా కేటాయిస్తారు. ఈసారి ఆఫ్రికా బృందం సోమాలియాను ప్రతిపాదించింది. ఆసియా-పసిఫిక్‌ దేశాల తరఫున పాకిస్థాన్‌ను ప్రతిపాదించారు. లాటిన్‌ అమెరికా, కరేబియన్‌ గ్రూపు పనామా పేరును ప్రతిపాదించింది. డెన్మార్క్, గ్రీస్‌లు ఐరోపా తరఫున నామినేట్‌ అయ్యాయి. ఈ కొత్త తాత్కాలిక సభ్య దేశాల పదవీకాలం వచ్చే ఏడాది జనవరి 1 నుంచి ఆరంభమవుతుంది. ప్రస్తుత తాత్కాలిక సభ్యదేశాలు జపాన్, మొజాంబిక్, ఈక్వెడార్, మాల్టా, స్విట్జర్లాండ్‌ల పదవీ కాలం ఈ ఏడాది డిసెంబరు 31న ముగుస్తుంది. భద్రతా మండలిని 21వ శతాబ్ది అవసరాలు, ఆకాంక్షలకు అనుగుణంగా విస్తరించాలని భారత్‌తో సహా అన్ని సమితి సభ్యదేశాలు కోరుతున్నా ఇంతవరకు అడుగు ముందుకుపడటం లేదు.