నదిలో మునిగి రష్యాలో నలుగురు భారతీయ వైద్య విద్యార్థుల మృతి

మాస్కో: రష్యాలో విషాదం చోటుచేసుకుంది. భారత్‌కు చెందిన నలుగురు వైద్యవిద్యార్థులు ప్రమాదవశాత్తు వోల్ఖోవ్‌ నదిలో మునిగి ప్రాణాలు కోల్పోయారు. ఇద్దరి మృతదేహాలను వెలికి తీయగా.. మిగతా వాటి కోసం గాలిస్తున్నారు. సెయింట్‌ పీటర్స్‌బర్గ్‌ సమీపంలోని యారోస్లావ్‌ ది వైస్‌ నోవ్‌గొరోడ్‌ స్టేట్‌ యూనివర్సిటీలో చదువుతున్న కొందరు విద్యార్థులు బుధవారం తమకు సమీపంలోని వోల్ఖోవ్‌ నది ఒడ్డుకు వాకింగ్‌కు వెళ్లారు. ఈ క్రమంలో ఓ విద్యార్థిని ప్రమాదవశాత్తూ నీటిలో జారిపడింది. ఆమెను కాపాడేందుకు నలుగురు విద్యార్థులు నదిలోకి దిగారు. ఈ ప్రయత్నంలో ముగ్గురు విద్యార్థులు కొట్టుకుపోగా ఓ అమ్మాయిని స్థానికులు కాపాడారు. మృతులను మహారాష్ట్రలోని జల్‌గావ్‌ జిల్లాకు చెందిన హర్షల్‌ అనంత్‌రావ్, జీషన్‌ పింజారీ, జియా పింజారీ, మాలిక్‌ మహమ్మద్‌ యాకూబ్‌లుగా గుర్తించారు.