అమెరికాలో ఎండలు భగభగ

రీనో: అమెరికాలోని నైరుతీ రాష్ట్రాలను భానుడి ప్రచండతాపం బెంబేలెత్తిస్తోంది. ఆగ్నేయ క్యాలిఫోర్నియా మొదలుకొని అరిజోనా, నెవడా రాష్ట్రాల వరకు గురు, శుక్రవారాల్లో పగటి ఉష్ణోగ్రత 43 డిగ్రీల సెల్సియస్‌కు చేరుకుంది. నెవాడా రాష్ట్రంలోని లాస్‌ వేగాస్‌లో శనివారం కూడా వేడి గాలులు కొనసాగనున్నాయి. నైరుతి అమెరికాలో వేసవి మొదలుకావడానికి ఇంకా రెండు వారాల వ్యవధి ఉన్నా సూర్య ప్రతాపం ముందే మొదలైంది. ఫినీక్స్‌ పట్టణంలో 45 డిగ్రీల సెల్సియస్‌ ఉష్ణోగ్రత నమోదై కొత్త రికార్డు నెలకొల్పింది. 2016లో ఇక్కడ నమోదైన గరిష్ఠ ఉష్ణోగ్రత 44 డిగ్రీలు. ఫినీక్స్‌లో రిపబ్లికన్‌ పార్టీ అధ్యక్ష అభ్యర్థి డొనాల్డ్‌ ట్రంప్‌ సభకు వచ్చిన వారిలో 11 మంది వడదెబ్బ తగలడంతో ఆస్పత్రిలో చేర్చాల్సి వచ్చింది. నెవడా రాష్ట్రంలోని రీనో నగరంలో సాధారణంగా 27 డిగ్రీల సెల్సియస్‌ ఉష్ణోగ్రత ఉంటుంది. గురువారం అక్కడ 37 డిగ్రీలు నమోదైంది. అరిజోనా రాష్ట్రంలోని కొన్ని ప్రాంతాలలో 43 డిగ్రీల సెల్సియస్‌ ఉష్ణోగ్రత కొనసాగనున్నది.