కశ్మీర్‌పై ఏకపక్ష చర్యలను అంగీకరించబోం: చైనా, పాక్‌ ప్రకటన

బీజింగ్‌: దక్షిణాసియాలోని వివాదాస్పద అంశాల పరిష్కారంలో ఏకపక్ష చర్యలను అంగీకరించబోమని చైనా, పాకిస్థాన్‌ ప్రకటించాయి. ‘రెండు దేశాలు దక్షిణాసియాలో శాంతి, సుస్థిరతల స్థాపన ప్రాధాన్యాన్ని గమనంలో ఉంచుకుని వ్యవహరిస్తున్నాయి. ఈ ప్రాంతంలోని కశ్మీర్‌సహా అన్ని వివాదాస్పద అంశాల పరిష్కారానికి కట్టుబడి ఉన్నాయి. అయితే ఈ విషయంలో ఏకపక్ష చర్యలను అంగీకరించేది లేదు’ అని శనివారం రెండు దేశాలు విడుదల చేసిన సంయుక్త ప్రకటనలో పేర్కొన్నాయి. పాకిస్థాన్‌ ప్రధాని షెహబాజ్‌ షరీఫ్‌ నాలుగు రోజుల చైనా పర్యటన ముగింపు సందర్భంగా ఈ ప్రకటన విడుదలైంది. జమ్మూ కశ్మీర్‌లోని తాజా పరిస్థితులను చైనా నేతలకు పాక్‌ వివరించింది. ఐక్యరాజ్య సమితి చార్టర్‌ ప్రకారం.. కశ్మీర్‌ అంశాన్ని శాంతియుతంగా ద్వైపాక్షిక చర్చల ద్వారా పరిష్కరించుకోవాలనుకున్న తమ సూచనను చైనా పునరుద్ఘాటించింది.