జపాన్‌ మాకు బలమైన మిత్రపక్షం

అమెరికా అధ్యక్షుడు ట్రంప్‌ ఉద్ఘాటన 
ఆయన్ను నోబెల్‌ శాంతి బహుమతికి నామినేట్‌ చేస్తానన్న తకాయిచి

టోక్యో: తమ దేశానికి అత్యంత బలమైన స్థాయి మిత్రపక్షంగా జపాన్‌ను అమెరికా అధ్యక్షుడు ట్రంప్‌ అభివర్ణించారు. టోక్యోకు ఏ సహాయం కావాలన్నా అందించేందుకు తాము ఎల్లప్పుడూ సిద్ధంగా ఉంటామన్నారు. జపాన్‌ పర్యటనలో భాగంగా ట్రంప్‌ మంగళవారం ఆ దేశ ప్రధానమంత్రి సనాయీ తకాయిచితో భేటీ అయ్యారు. అమెరికాలో జపాన్‌ పెట్టుబడుల పెంపు సహా పలు ద్వైపాక్షిక, ప్రాంతీయ అంశాలపై చర్చించారు. రేర్‌ ఎర్త్‌ మినరల్స్‌కు సంబంధించి జపాన్‌తో అమెరికా తాజాగా ఒప్పందం కుదుర్చుకుంది. టోక్యో సమీపంలోని అమెరికా నౌకాదళ స్థావరంలో నిలిపి ఉంచిన విమాన వాహక నౌక యూఎస్‌ఎస్‌ జార్జ్‌ వాషింగ్టన్‌పై తమ దేశ బలగాలతో ట్రంప్‌ కొద్దిసేపు మాట్లాడారు. ఆ సమయంలో జపాన్‌ ప్రధాని కూడా ఆయన వెంట ఉన్నారు. మరోవైపు- ట్రంప్‌ను తాను నోబెల్‌ శాంతి బహుమతికి నామినేట్‌ చేయనున్నట్లు తకాయిచి తెలిపారు. ఈ విషయాన్ని అమెరికా అధ్యక్షుడికి ఆమె స్వయంగా చెప్పారు. ట్రంప్‌ను ఆ పురస్కారానికి నామినేట్‌ చేయనున్నట్లు కంబోడియా ప్రధానమంత్రి హున్‌ మానెట్‌ కూడా సోమవారం ప్రకటించిన సంగతి గమనార్హం. 

యుద్ధం ముగింపుపై పుతిన్‌ దృష్టిపెట్టాలి: ట్రంప్‌ 

అణుశక్తితో నడిచే బురెవెస్ట్‌నిక్‌ క్రూజ్‌ క్షిపణిని రష్యా ఇటీవల పరీక్షించడాన్ని అమెరికా అధ్యక్షుడు ట్రంప్‌ తప్పుబట్టారు. అలాంటి పరీక్షలు నిర్వహించడానికి బదులు.. ఉక్రెయిన్‌తో యుద్ధాన్ని ఆపడంపై దృష్టి పెట్టాలని రష్యా అధ్యక్షుడు పుతిన్‌కు హితవు పలికారు. ఎయిర్‌ ఫోర్స్‌ వన్‌ విమానంలో విలేకర్లతో మాట్లాడుతూ ట్రంప్‌ ఈ వ్యాఖ్యలు చేశారు. అణ్వస్త్ర సామర్థ్యం కలిగిన అత్యంత శక్తిమంతమైన జలాంతర్గామిని రష్యా సముద్ర తీరానికి సమీపంలో అమెరికా మోహరించి ఉంచిన సంగతిని పుతిన్‌ గుర్తుంచుకోవాలని అమెరికా అధ్యక్షుడు పేర్కొన్నారు.